- Digər xəbər və məqalələr, İpəkçilik

Ən yaxşı halda 650 ton yaş baramaya ümid etmək olar

Kənd təsərrüfatı naziri İnam Kərimov mayın 4-də Qax Damazlıq İpəkçilik Stansiyasında ipəkqurdu toxumlarının inkubasiyası nəticəsində əldə olunan ipəkqurdunun kümçülərə paylanılması ilə bağlı keçirilən tədbirdə jurnalistlərə müsahibəsində vurğulamışdı ki, bu il yaş barama istehsalının 800 tona çatdırılması nəzərdə tutulur.

Amma iyunun 24-ü üçün cəmi 626, 5 ton barama tədarük olunub və barama tədarükü isə yekunlaşmaq üzrədir. Belə ki “Azəripək” MMC 23 iyunda cəmi 2,73 ton yaş barama qəbul edibsə, 22 iyunda 6,45 ton, 21 iyunda 7,68 ton, 20 iyunda 11,5 ton, 19 iyunda 11,4 ton, 18 iyunda 24,7 ton, 14 iyunda 11,14 ton, 15-16 iyunda 54,06 ton, 14 iyunda 47,66 ton, 13 iyunda 121,69 ton yaş barama qəbul etmişdi. Göründüyü kimi barama qəbulu azalan sırada davam edir və nəzərdə tutulmuş 800 ton baramadan heç söhbət belə gedə bilməz, ən yaxşı halda 650 ton yaş baramaya ümid etmək olar, vəssalam.

Məlumat üçün əlavə edək ki, Azərbaycanda baramaçılığın və ipəkçiliyin inkişafına dair 2018–2025-ci illər üçün Dövlət Proqramının icrası nəticəsində 2025-ci ilədək yaş barama istehsalı həcminin 6 min tona çatdırılması nəzərdə tutulub. “İpəkçi” qəzeti isə öz növbəsində ötən il proqnoz verib ki, “təşkilati işlər ən yüksək səviyyədə həyata keçirilsə də barama qurdu bəslənilməsi üçün yem bazasının zəif olması  növbəti 4 il üçün Azərbaycanda ildə 600-700 tondan artıq yaş baramanın tədarük edilməsini mümkünsüz edir“.  Builki nəticə həmin proqnozun doğru çıxdığını göstərdi.

Bu il qurd toxumunun məhsuldarlığı da xeyli azalıb. Əgər ötən il bir qutudan orta hesabla 39,532 kq məhsul götürülübsə (Bax:>>), bu il məhsuldarlığın 32,25 kq-dan çox olmayacağını proqnozlaşdırmaq olar.

Aydın Məmmədov

Bir cavab yazın

Sizin e-poçt ünvanınız dərc edilməyəcəkdir.